PURWOKERTO – Sapa nyangka, ternak iwak gurame sing katon prasaja malah isa dadi sumber duit sing lumayan. Kuwi dibuktekna karo Aandes, wong sing saiki sukses ngelola limang kolam gurame senajan lahane ora jembar.
Kuncine dudu nganggo alat canggih utawa modal gedhe, tapi luwih neng cara ngirit biaya lan telaten ngopeni iwake.
“Ngopenine sejatine ora ribet, sing penting ana panganan cukup. Makane mung godhong-godhong wae wis cukup,” ujare Aandes.
Kanthi nggunakna pakan alami kaya godhong, biaya dadi luwih irit banget dibanding ternak iwak liyane. Mula usaha gurame iki cocok kanggo sing arep miwiti usaha nganggo modal cilik.
Aandes dhewe miwiti saka nol, mung nganggo siji kolam karo modal kira-kira Rp5 yuta. Saiki wis dadi limang kolam, saben kolam isine kurang luwih 200 iwak.
Sakali panen, hasile isa nganti 600 kilogram. Yen rega gurame kisaran Rp50 ewu saben kilo, ya lumayan banget bathine.
Ora mung soal panganan, miturut Aandes, sing penting kuwi kudu rutin ngecek banyu lan telaten ngopeni.
“Sing penting rajin dicek, banyune dijaga, karo kudu telaten. Wis kuwi tok,” tambahé.
Critane Aandes dadi bukti nek senajan lahan sempit lan modal ora akeh, tetep isa miwiti usaha. Sing penting gelem nyoba lan ora gampang nyerah.
Usaha gurame kaya ngene iki dadi peluang sing nyata kanggo wong-wong sing pengin golek penghasilan saka omah.
0 Komentar