Medeni Nemen, Wis 5 Wulan Ditahan, Akhire Bebas! Buruh Tambang Ajibarang Menang Neng Pengadilan

PURWOKERTO – Sidang kasus tambang emas Ajibarang sing wis suwe dadi omongan wong akeh, akhire tekan putusan. Majelis hakim neng Pengadilan Negeri Purwokerto mutus bebas telu terdakwa, Kamis (2/4/2026).

Sakwise palu diketok, suasana langsung pecah. Keluarga lan pendukung sing teka ora kuwat nahan haru, ana sing nangis, ana sing sujud syukur. Soale telu wong iki sing sakdurunge ditahan, saiki resmi dinyatakan ora salah.

Djoko, sing melu ngawal kasus iki, ngomong nganggo rasa lega. Dheweke nyebut yen putusan iki dadi bukti nek keadilan isih ana, ora mung kanggo wong gedhe, tapi uga kanggo wong cilik.

“Alhamdulillah, puji Tuhan. Wong-wong iki mung buruh, golek mangan saben dina. Ning malah kudu mlebu pengadilan. Saiki wis bebas, iki bukti nek keadilan isih ana neng negara kene,” ujare.

Dheweke uga nyentil kahanan buruh tambang sing kerep dadi korban. Miturut dheweke, wong-wong kaya ngene iki mung dadi pelaku paling ngisor, ning sing kerep kena malah ya dheweke.

“Wong cilik aja nganti terus dholimi. Aja nganti mung dadi tumbal. Kudu ana sing mbela,” tegesé nganggo nada cablaka.

Saka putusan kuwi, telu terdakwa dinyatakan bebas murni. Dene siji maneh, Slamet Marsono, entuk hukuman percobaan, artine ora perlu mlebu penjara nek ora nglanggar hukum maneh sajrone masa percobaan.

Salah siji terdakwa, Romy, ora bisa nyumputke rasa harune. Limang wulan neng tahanan dadi pengalaman sing ora bakal dilalekke.

“Alhamdulillah, wis plong. Limang wulan ditahan kuwi abot banget. Sing paling kerasa ya adoh karo anak. Kaya ilang peran dadi bapak neng omah,” kandhane karo mata berkaca-kaca.

Kasus iki wiwit rame merga tambang emas neng Desa Pancurendang, Kecamatan Ajibarang, sing diduga ilegal. Ning sajrone sidang, ketok cetha nek para terdakwa iki mung buruh, dudu sing nduwe utawa ngatur tambang.

Saka kahanan iki, akeh sing nganggep nek penanganan tambang ilegal kudu luwih adil. Aja mung buruhe sing dicekel, ning sing nduwe modal lan ngatur operasi uga kudu ditindak tegas.

Masalah tambang ilegal dhewe nganti saiki isih dadi PR gedhe, ora mung neng Banyumas tapi uga neng daerah liya. Faktor ekonomi lan angelé golek kerja dadi alesan utama wong-wong tetep mlebu tambang kaya ngene.

Putusan bebas iki dadi angin seger kanggo wong cilik, ning uga dadi pengeling-eling nek perjuangan golek keadilan kuwi ora gampang, tapi isih iso digayuh nek terus diperjuangke.